هـ ذ ر ه .. ما ينقظب لها شي خخخخ :d اريكسون

السلام عليكم ورحمة الله وبركاته .. طبعاً هذا أول موضوع لي بالنيو لوك قصدي باليوزر المستقل :biggrin2: , بصراحه ما لقيت له عنوان وهو شوية سواليف وقرق ومواقف من وحي الخيال والواقع .. حبيت أطرحها وتشاركوني فيها لو ودكم :) تخيلي نفستس متخرجة ونويتي تسوين حفلة .. وأختس ذوقها وترتيبها لحفلتها قبل كان روعة وطلبتي منها تسوي ترتيبات هالحفلة ووافقت بس قلتي الكيكة ابيها على ذوقي والباقي على ذوقتس .. جا يوم الحفلة ولبستي وكشختي وبما انتس واثقة من إن الحفلة بتصير اوكي .. بس همك الكيكة كل شوي تسألين عنها .. ( وطبعا حنا متى نشوف الكيكة؟ :biggrin2: خخخ بيوم الحفلة قبل الحفلة بساعة أو ساعتين وهي اخر شي يوصل من الترتيبات ) يوم وصلت رحتي تشوفينها .. صارت الكيكة غييييييير تماما عن اللي طلبتي .. وحطيتي حرتك في الضعيفة اختتس وعصبتي لييييه بس الشي الوحيد اللي ابيه ماصار :mw_evilmad: .. ولا عشانه موب على ذوقها!! وسويتي هيصه ومناحه عشانها.. طبعا انتي مكان صاحبة الحفلة .. بتحسين انتس مقهوره شي واحد تبينه وماصار يعني أنتي ماتدخلتي بترتيباتها بس طلبتي الكيكة على ذوقتس .. وهو الشي الوحيد اللي ما صار زي ماتبين.. طيب لو تخيلتي العكس؟ انتي مكان الاخت.. وتعبتي بذا الحفله من الألف للياء .. وفجأه عشان شي واحد صرتي أنتي ماتدبرين وماتعرفين تنسقين حفلات .. وضربت بكل اللي أنتي سويتيه وترتيبات الحفله كامله عشان شي واحد !! ..يعني عند غلطه " مالتس أي ذنب فيها ".. نست الباقي! قهر صح؟ طيب نجي للأهم .. لما يكون الطرف الثاني رجال .. وتتعدد المواقف بهالسالفه.. ... 1 ... أخوك فيه حركات لعانة - اللي ما يخلى منها أي سعودي - لكن مع هذا طيّب ولين طلبتي منه يوديك لمكان يرفع ضغطك شوي بكلامه بس بالأخير يوديك .. :mw_blush: إلا مره .. ذاك اليوم مجتمعين صديقاتك في بيت وحده و أخذتي الإذن من اهلك ومرررررررره متشفقه ع الروحه .. لدرجه انك ممكن تسوين أي شي عشان تروحين .. جا أخوك وقال لا ماني موديك .. مالي نفس اطلع اليوم من البيت .. شوفي أحد غيري يوديك .. ولا تدرين وشوله الروحه أصلن ! ويقولها بكل جديه .. وأنتي من شدة العصبيه .. قلتي ما شاورتك أصلن ع الروحه ما نتب موديني موب لازم .. عمى ما فيك خير ! وش هالنذاله ! منتب موديني وتبي تخرب علي الروحه ! وبديتي ترمين كلام وأخوك طلع من عندك وخلاك ! وأبوك أساسا معزوم وطالع من العصر .. يعني ما فيه إلا وحده من البنات تمرك..ولا الروحه بح ! :032: ... 2 ... اليوم عندتس عزيمة .. وطبعا العزيمة يبيلها طلبات وترتيب .. كتبتي لستة طلبات ناقصه من تشوكلت /جبن كيري/ نستله/ مناديل سفره/ قهوة تركية … الخ . .صفحه كامله معبيتها وعطيتيها رجلتس .. وراح رجلتس وجابلتس اللي في الورقة زي ما طلبتي وأنتي تفتشين بالأكياس تدورين جبن الكيري تبي تكملين الحلا الحين .. ومالقيتيه ! وبتلتي تحوسين.. شافتس رجلتس ماغير تحوسين بذا الأكياس ووجهتس متغير! قالتس وش فيتس؟ قالت ادور جبن الكيري .. قال والله مالقيته بالسوبر ماركت .. وأنتي فجاه خبطي بالكيسه بيدتس.. " وكنه قايل مريت عليه وطنشته " وقلتي يووووووه لازم مره مره شلون يعني اكمل الحلا!! تبيني اقدمه ناقص! ولا موب مزين ! ..ولا تبيني مااقدمه خير شر! وش يقولون عني! والرجال طايرتن بوهته ! الحين يالتبن رجلتس ماجابه عناد ولا مسكت معه غلط مايجيبه يقولتس فرالسوبر ماركت مالقاه تبينه يفر لتس الديره كلها يدور لتس جبن!! محد قالتس سوي حلا وطلباته ميب جاهزه عندتس!! وبعدين هذا بدال ماتقولين يعطيك العافيه ! جاب لتس كل اللي طلبتي الا شي واحد ! ومجتهد بعد يدوره لتس ما يبي يرجع الا وكل شي مكتمل ! وهذا ردتس؟ وجع أن شاء الله جعل حلاتس ما يذوقه احد !